Sail Banda dan Salei Blanda

Di jiku rumah besar upulatu, Dace baku dapa Etus...

Dace: Konyadu manis ee, ale dar mana tuang? su lama paskali tinggilang seng lia ujung rambu...

Etus: Dace, ose ni memang tar laku. La ini ose tau ka seng samua orang ada maniso deng sail banda di katong pung bendar sapanggal ni. Os dar mana saja?

Dace: Istaganaga, ini katong ada tanya babae yo konyadu su manyala macang bagitu skali? Bet tanya ose, ose bale tanya beta. Lalu sapa musti jawab sapa ni?

Etus: Bukang bagitu nyadu. Anana kacupeng klas 1 SD saja tau katong ada balumpa kiri-kanan par ator bendar ni tarima dong dari saniri besar. No bet jawab ale kamuka. Beta ni maso jadi seksi "papalele" di sail banda. Ale?

Dace: hahahaeee... wangala ampong beta jua he-e ni. beta ni memang pata pena lai, maar kalo soal seksi-seksi beta seng undur ale kapa. Baru beta dengar par oras ni ada seksi "papalele"... akang bagumana tu nyadu?

Etus: Haayooo, susa jua stori deng anana macang bagini. Su mangaku pata pena, maar biking diri mangarti satu kapala. He, dengar beta, ini skarang katong su seng pake stori tinggi-tinggi lai. Seksi papalele tu akang sama deng seksi promosi. Jadi beta bajalang dar ujong kampong satu abis satu par tabaos anana bendar siap diri par akang sail banda ni. Suda? Ale su tangkap beta pung bicara?

Dace: Ooo... bilang bagitu dar tadi. Barang aer-aer saja tu... Jadi nyadu biking apa di situ?

Etus: Ha, kalo ale tanya bagitu baru sdap. Beta tabaos kiri-kanan par anana negri katong musti siap diri par tarima investor maso di katong pung kintal negri; katong pung negri ni akan jadi lumbung ikan nasional; katong musti tumbuhkan semangat kewirausahaan untuk bangun kerjasama deng pengusaha-pengusaha berkaliber internasional. Ha, itu dolo... Ale bisa mangarti akang ka seng?

Dace: Hahahaeee... konyadu e. Mangapa barang-barang bagitu ale musti tabaos akang lai? La ale kira selama ini seng ada inspektor eh investor yg maso di katong pung tanah ni ka? Co ale bale muka lia katong pung kintal-kintal su tagepe ancor tagal dong su kas badiri sagala macang perusahaan. Ale sangka katong masih bisa jadi lumbung ikan nasional? Co manjura kapala ka lau biru-biru, ale sangka cuma katong yang buang jareng gete-gete... itu kapal-kapal basar su kuras abis isi laut sampe katong su tar dapa ampas lai. Ale kira katong seng pica kapala par wira usaha? Laste-laste katong cuma bisa jadi wiro sableng.

Etus: Cukardeleng, beta pung nyadu ni biar pata pena tapi bole lai...

Dace: Beta mo bilang bukang, beta sangaja seng unju rupa sabulang ni tagal beta mo lia kata katong anana negri ni mangarti akang sail banda ni bae-bae ka cuma iko rame. Barang ini bukang cuma jadi "kebanggaan" mar musti jadi "tanggung jawab". Katong ni potong pusa di tanah ni musti tau apa yang jadi di sini. Dengar orang pung bicara bisa saja nyong, maar jang percaya dong kewel. Katong yang tau katong pung kahidopang di ewang deng laut.

Etus: Nyadu ale ni batu lai...

Dace: Seng jua nyadu. Beta ni orang bodo. Seng sama deng katong pung tuang2 besar yg jago barekeng sagala macang. Mar beta seng mau kalo katong cuma iko rame "sail banda" la tar urus apa2 abis itu. Lalu laste-laste skrek kata katong su "sale banda" atau jual tanah/laut par kasta2 galojo tu. La tinggal katong gigi jari, rabe mata, aer mulu tumpa, tagal su seng ampas lai par katong... Ini yang beta taku: jang sampe SAIL BANDA akang jadi SALEI BLANDA... rasa sdap di mulu mar abis capat2 saja.

Etus: Memang, memang, memang, kalo soal ini nyadu e beta musti bilang: ose seng ada lawang. Manyimpang nyadu ee...

Dace: Tagal itu jang cuma maniso deng se pung seksi papalele tu. Musti mangarti batul-batul. Co se lia laporan menteri "lautan biru", tuang Siake Manue, waktu ontua ada inspeksi pasar di Prancis sana. La ose rekeng saja.

(gandong ee, ini cuma kewel Dace deng Etus.... jang simpang di hati kio. Amatooo)