Aku menulis maka aku belajar

Monday, March 7, 2011

Aer Babasu

Pulang dari kabong, karingat balong karing di badang lai, Dace skrek dengar Etus su tabaos dia pung nama dar kintal ruma.

Etus: Nyadu ee… Dace… mari kaluar dolo!

Dace: Tuandalar ee… ini apa ni?! Etus e, mangapa lai? Par oras bagini ose su tarewas beta pung nama macang ada dapa iku dar buntilana bagitu…

Etus: Suda jua nyadu manis tuang hati ee… ale mo mara beta nanti simpang dolo. Sakarang ni dengar beta bilang inpormasi klas satu ni dolo…

Dace: Kalo baru klas satu, loko kasi akang par yongen kacil jua. Dia ada baru dudu di klas satu tu.

Etus: Oee, Dace, beta serius ni… Ose taru se pung manara tu, lalu baganti bagus2 la iko beta ktong pi ka lau.

Dace: Hoi, ale su prenta skali ni… bilang dolo ini ada mangapa?

Etus: Orang2 su bakumpol paleng banya di tana lapang di lau. Beta dengar rombongan dari bendar ada bajalang unju rupa “calon ayau” par anana negri. Mar itu soal blakang. Yg lebe penting, dong ada bajalang bage baju kaos deng gambar2 paleng banya ee…

Dace: Ahahahaeee… Etus e, bet kira apa lai… La barang2 bagitu katong su amper loha akang te… saban kali mau sorong kursi ayau baru, dong musti bajalang unju rupa par anana negri. Nanti par oras su dudu di kursi ayau dong su tar nodek anana negri lai. Ose lia saja katong pung jalang mo masu2 negri dari taong adam, ayau satu abis satu sumbur janji, mar sang oras ni mana kang?

Etus: Hoe, nyadu e, ale seng bole bagitu. Katong ni memang orang kacil mar katong musti unju lai kalo katong tau master orang pung hal. Yg paling penting tu, katong ni warga bendar yg musti taru tanggung jawab par akang bendar ni kio.

Dace: Hahahaee… Etus, os bicara macang kata polotisi2 bagitu. Se jang ajar beta barang2 polotik tu. Beta su kanyang akang. Sakarang ni akang pung konci rekeng katong jaga nanaku dong pung karja saja. Jang sumbur janji kiri-kanan sondor karja, rembeng tomas deng toga kamana-mana. Laste2 katong yg warga bendar musti pikol dong sagala perkara yg jadi eso2. Lebe lae katong cuma dapa siram deng aer babasu…

Etus: Iyo, iyo, beta tau ale memang jago. Mar ale musti hormat ale pung nyadu ni yg su sorong diri par panggel ale. Soal2 polotik tu kas tinggal dolo. Sakarang ni mari iko beta katong manggurebe japre baju2 kaos deng kaeng gambar2 di lau…

Dace: Haa… kalo bagitu beta seng lari konco. Kalo tiap pemilihan ayau katong dapa jatah baju kaos macam bagini, katong seng perlu buang gobang par beli baju kaos lai…

Etus: Yah tuheng, jadi ale ni cuma tarkira baju kaos saja?

Dace: Lalu? Kalo dong su dudu di kadera ayau, dong su tar nodek par lia barang2 bagini lai nyadu e… tagal itu orang bilang ini pesta demokrasi. Abis pesta? Pulang jua… sapa yg datang pesta su abis, bisa dapa siram deng aer babasu…

Etus: Hahahahaha…. Suda jua. Beta seng dapa slak par bicara barang ini deng ale.

Dace: Barangkat!!

No comments:

Post a Comment

One Earth, Many Faces

One Earth, Many Faces