Mulu Bobara

Beta inga kalo pas musim piala dunia ato piala eropa katong pung bendar rame paskali. Sagala jiku lorong deng ruma, dalang kantor-kantor sampe ruma-ruma kopi, orang-orang bastori bola. Rame paskali. Samua orang biking dong pung analisa bola sampe mulu baskoim. Dong carita bola deng pemain-pemain bola sadap paskali, parcis kata dong manajer bola. Torana kopi rarobang slak par slak cuma par tahang biji mata tabuka matawana bola. Biar suda mo maso kantor ka skolah lat sadiki seng apa-apa jua yang penting bisa tarewas par pagi hari nonton bola. Apalai kalo pisang goreng panas-panas sorong di atas meja... wangala ee... bola balong gol lai maar pisang su gol ulang kali.

Maar co katong lia minat bola dari kategori fans, orang Ambon rata2 seng talalu tapica banya. Amper rata-rata pegang Walanda alias Holland. Kalo tanya dong mangapa pegang Walanda, dong jawab sdap sa... barang katong pung bangsa ada di situ. Memang susa jua kalo mo ure akang batul-batul. Beta jaga tanya dalang hati, ini tagal Walanda tindis katong talalu lama kapa e dolo-dolo sampe katong susa paskali "pindah ke lain hati". Hehehe... ya kutok biking diri macang ada bicara Etus deng Yakomina pung cinta bagitu. Maar ini batul ee... macang ada fanatisme Walanda yang susa paskali ilang dari orang Ambon pung kapala.

Beta bongkar buku-buku par cari tau mangapa katong bisa fanatik Walanda kalo su bicara bola. Seng dapa jua. Seng ada informasi yang tabuka trang bagitu. Memang ada satu dua catatan sejarah yang bilang katong pung orang tatua dolo-dolo tu dapa perlakuan istimewa dari kasta Walanda ni. Maar seng samua jua. Rata-rata katong pung bangsa tetap ada di bawah Walanda pung kaki atau paling tinggi di bawah katia. Seng bisa lebe dar itu. Tapi rupanya perlakuan yang seng talalu istimewa itu akang masi lebe bae dar apa yang dirasakan oleh sebagian besar bangsa laen. Jadi masa-masa itu katong pung orang tatua memang bisa pukol papang dada unju kata dorang bisa pegang tampa-tampa babasa dalang pemerintahan kompeni Walanda. Mo bilang apa? Akang pung masa memang biking sampe dong rasa bagitu.

Maar sakarang? Mangapa katong generasi abad 21 ni masi rasa baku tarika deng Walanda tu la? Beta balong tau dia pung jawab. Kalo beta bisa putar nyiru car tau akang mangkali nanti beta kas tau ale dong. Yang beta lia deng beta pung biji mata dua ini yalah katong merasa tarika deng Walanda karna katong pung sejarah memang su baku tamakang deng sejarah komunitas Maluku di Walanda. Komunitas KNIL asal Maluku yang dong Walanda bawa langgar lautan sampe di tana Walanda. Sapa mo sangkal akang? Beta pung maitua sa pung opa pung kerko ada di Walanda. Itu opa gandong.

Tamang ee, co katong lia akang dar sisi laen kio. Kalo jaman susa dolo katong pung basudara yang tabuang di Walanda bisa batahang hidop, bahkan bisa melahirkan bintang-bintang besar sekaliber Simon Tahamata, Sonny Silooy, Daniel Sahuleka, Ais Lawalata, dll... mangapa kong katong sakarang yang hidop di tanah merdeka, tanah sendiri, seng bisa melahirkan bintang-bintang besar berkelas internasional macam dong ee? Jang sala gandong ee... beta seng manyangkal kalo katong punya Ronny Pattinasarany, Broery Pesulima, Ule Pattiselano, dll sampe yang ada sakarang ni Sam Wattimena, Bara Pattiradjawane deng "Kick" Andy Noya. Tapi mangapa dalang era internet deng globalisasi macang bagini katong seng mampu tabaos sampe dapa dengar di luar gunung tana? Beta lia, laste-laste katong cuma baku tabaos di katong pung bendar sapanggal tu.

Jang ale sala tar' kira beta. Beta bukang mo biking diri jago. Seng. Beta cuma mo bilang voor beta diri sandiri: sakarang ni katong mustinya lebe progresif dan kreatif voor manggurebe banya peluang, dan yang paling penting konsisten biking akang. Yang beta maksud bukan hanya peluang par iko Indonesian Idol. Bukan cuma itu! Katong musti manjura kapala jao voor lia ada peluang apa yang katong bisa maso voor unju katong pung prestasi dan kualitas. Maar saban kali beta hati tairis lai kalo lia katong lebe maniso deng urusan-urusan kacil deng lebe suka jadi orsu par orang laeng. Sementara kalo badati deng bangsa sandiri... ayo eeee... baku malawang tar ujung pohong. Lebe lai baku potong deng parang panjang. Lalu orang laen topu tangang, bataria katong jago... maar seng tau kata katong ada cakalele deng dorang pung tifa.

Beta blajar dari katong pung orang tatua yang pernah melahirkan prestasi bagi gunung tana maupun negara ini. Ada Johannes Leimena, Dirk de Fretes, yang pernah tercatat sebagai politisi dan negarawan andal republik ini; ada Chris Soumokil yang karna prinsip kemerdekaan asasi sebagai bangsa Maluku seng mau RIS dibubarkan; ada Sam Pormes yang jadi anggota parlemen Belanda; ada Letjen Suadi Marasabessy dan Brigjen Leo Lopulisa; ada Prof. Ris Leirissa; ada Prof. J. Sahetapy, dll. Lepas dari dong pung plus-minus, katong musti angka capeu par dong yang sadiki banya biking katong muka tarangka dalang pergaulan nasional. Maar beta jua hati tairis kalo sadar bahwa katong balong kaluar dari cara berpikir nau-nau yang seng belajar survive di tenga konteks yang kompetitif. Lebe lai, katong maraju la kas salah orang laeng. Su bagitu katong seng blajar trima kekalahan lalu belajar dari akang supaya mencapai kemenangan di masa depan. Katong cuma baribot, taputar tabele deng katong pung urusan kintal. Seng lia kata katong bisa biking apa di kintal laen.

Basudara tuang hati jantong ee, jang mara beta kio, kalo beta bilang bagini itu bukang karna beta jago ato biking diri mangarti. Seng bagitu tamang. Beta sama denga ale dong samua. Cuma orang biasa yang balisa kalo tar bicara Ambon pung hal. Memang katong seng bisa biking samua tutu mata buka mata la akang jadi bagitu saja. Katong musti sabar dalang proses ini. Katong balong abis hosa deng baku bakalai basar kalamareng tu... Katong su ancor-ancor. Maar katong pung pengharapan seng perna bisa ancor. Selagi masi ada anana alifuru yang mau taru hati deng buang mata par gunung tana, selalu ada harapan voor katong biking hal-hal yang baru dan positif. Itu cuma dari niat sa tamang ee... Tinggal katong pili sa: mo tinggal pukol papang dada deng nostalgia dolo-dolo; mo bamulu deng sagala tantangan; mo mangkera maju potong ombak; ato... mo tinggal batahang deng apa yang ada lalu tinggal balaga sumbur kata-kata sondor isi cuma par jadi badot yang orang tatawa katong alias cuma kas unju katong pung mulu bobara. Beta seng bisa jawab akang karna beta jua ada berproses deng akang.

Bagitu jua...