Babengkeng

Matahari balong pica bae-bae par pagi hari, Dace su datang batamu di Etus pung ruma. Etus yang ada manyapu kintal skrek, bukang tagal lia Dace datang mar lia Dace pung dalang muka yang takoro tar bae.

Etus: Nyadu e, hari bae. Ada apa tuang ale mangente beta par oras matahari balong pica di atas tu?

Dace: Etus e, jang kurang hati kio. Mar beta minta ale taru manyapu tu dolo la mari dengar beta pung stori ni… Ini gawat!

Etus: Hei, ini su mangapa lai kong ale su ator skali ni?

Dace: Suda, jang ale talalu batanya. Taru manyapu tu la dudu dengar beta pung carita ni. Bilang maitua kalo su masa aer panas la tuang kopi rarobang par katong dua dolo…

Etus: Oee Dace, biar kata konyadu lai mar ini ada apa kong sampe ale su ator beta pung dalang ruma par oras ni… Lebe se bilang tempo jang sampe manyapu lari pilang ale pung muka kaki.

Dace: Bagini Etus. Beta pung maitua ni su dua minggu ni kong tinggal babengkeng. Dia tinggal taru kira beta ada pake kepeng papalele par apa sa… balong abis bulang lai su kit. Karing-karing. La dia tinggal gepe beta deng isu selingkuh. Wangala ampong beta jua... katong pung “onderdil” su tar ON par akang selingkuh tu. Tapi yo dia tinggal babengkeng deng akang.

Etus: Ahahahahaeee... Dace, bet kira ada apa. Oe, babengkeng tu bukang su biasa dalang hidop laki-bini. Tinggal ale ator bae-bae, buju dia manis-manis supaya dia tau kalo ale pung sayang cuma par dia. Ka memang ale ada su mulai taputar deng orang laeng?

Dace: Tuheng… ampong jua helo… Nyadu e, yang ale sumbur tu beta su biking akang samua tu. La ini beta bilang katong ni su seng bisa simpang gobang di bawah bolsak lai. Kepeng-kepeng papalele tu beta simpang akang di bank supaya aman. Eso-eso katong bisa pake akang par lia kacil pung sakola sampe abis-abis “S”. Mar tar mangarti jua… tinggal babengkeng sampe su tar nodek deng katong pung apa-apa lai.

Etus: Oe Dace, su jadi laki-bini sampe su langgar 20 taong ni jang macang anana alus-alus yang sadiki babengkeng, baku mara, cuma tagal barang yang bisa bicara deng ator bae-bae. Daripada ale bicara banya lebe kas unju buku bank par maitua to… lalu kas mangarti dia.

Dace: Itu akang nyadu. La ini biking batul rumah par katong tinggal sama-sama saja dia pi baribot akang lai. Ini sapa kasi kepeng? Ada baku tarika apa sampe orang kasi kepeng? Bautang di mana? Hayoooo eee… beta kapala saki.

Etus: Hahahaeee… bagitu suda nyong manis. Hidop laki-bini tu akang pung sadap di situ lai. Ale tau babengkeng tu tanda maitua masi cinta ale... dia mo bilang cuma ale sa Dace di beta pung hati, jang khianati beta pung cinta ni... Kalesang bini sadiki. Jang inga diri saja.

Dace: Istaganaga Etus… ale kira beta ni anana nae badang kapa yang kong tinggal bicara cinta-cinta mangkal macam bagitu. Cinta mangkal tu asam tinggi. Beta pung cinta par dia tu seng bisa bilang akang lai… la ini su “batalor” sampe tiga ni…

Etus: Haaa… ale pung “kecelakaan” di situ. Bicara cinta ni bukang soal anana nae-nae badang. Mar ini katong pung soal samua. Cinta tu seng kanal oras nyadu… slak-slak ale musti bisi-bisi par dia: Mina e, ale tamba umur tamba manis saa… macang beta tamba sayang ale. Na, jang sampe ale maniso papalele par kepeng sampe lupa bilang kata-kata manis tu par maitua.

Dace: Ah suda jua... nanti soal itu beta manyimpang akang sandiri jua. Jang ale ator sampe dalang beta pung kamar. Etus e, beta su ada ni, bilang maitua kas kaluar kopi rarobang deng kasbi rabus jua par ale pung nyadu ni isi poro sadiki. Ini tagal maitua babengkeng sampe katong su tar isi poro.

Etus: Oe Dace, ingatang, ini ale datang beta seng minta. Jang sampe kayo manyapu salep ale pung bitis-bitis ni.

Dace: Hahahaeee… ampong jua nyadu ee… Macang ale tar mangarti beta sa…. Prikitiuuuu..