Kewel

Etus “kamboti” deng Dace “meti” itu nama dua mongare dari Naku, satu negri alus-upeng tagepe Kilang deng Hatalai di balakang gunong Sirimau, Ambon. Di Naku, su biasa panggel orang pung nama deng dia pung “gelar” iko dong pung ciri khas. Etus ni laki-laki basar poro bibi, paleng suka makang – jadi orang negri panggel dia kamboti. Kalo Dace ni kapala kalor biking diri mangarti samua hal – orang negri panggel dia meti tagal dia pung kalor tu. Satu kali amper mati-mati glap dorang dua ada baku dapa di kintal baileo.

Dace: Etus ee... mangapa lai ale par amper glap ni dudu basena di sini? Pi pulang mandi sana.

Etus: Oee Dace, jang se tabaos takaruang di muka ruma orang tatua ni. Bae-bae jang sampe ana lida taputar. Se seng lia bapa raja ada dudu pikir negri upeng ni. Mari ka mari dolo jang se lanjut talucu pulang.

Dace: Hahahaeee... bapa raja tida mo, mangkali raja kodok. Se ada pikir negri pung apa lai? Akang negri ni par bagini suda. Tamba hari tamba sunyi tagal samua tarengke-rengke basoso di kota. Dong su seng pastiu lai par ator negri.

Etus: Dace, jang se bilang bagitu. Biar hidop kasiang-kasiang bagini beta ni masi taru kira par katong pung negri. Beta ada hati susa lia katong pung hidop su seng macang dolo lai. Co ale lia... biasa oras bagini katong ada dudu basena rame-rame kewel deng maeng kartu par biking sanang diri sa. Maar sakarang? Seng mai, seng pai, seng anana, lebe suka dudu tapaku di muka telepisi rabe mata sampe tenga malang par akang sinetron-sinetron padede tar laku-laku.

Dace: Tamang ee...jang ale bilang bagitu. Itu tiap orang pung hal, katong seng bisa barsungut deng akang. Tapi yang ale bilang tu batul. Jang di sini, di beta pung ruma sa su paleng jarang katong dudu bastori. Kas kaluar suara sadiki sa bini deng anana su tabaos katong tutu mulu par dong ada tapaku di muka telepisi. Beta pung kacil, Poli, su tar master deng dusung lai. Sabang hari karja pulang skolah pastiu deng dia pung baju kos, galang, capatu, supaya sama deng artis-artis sinetron.

Etus: Itu akang kiyo. Co ale lia tampa jalang di negri su paleng badaki. Anjing pung bera, daong-daong karing, anana buang kartas kukis talamberang di mana-mana. Tete Onggo bilang beta kalo negri badaki tu tanda katong musti biking barsih hati. Negri ni bukang cuma katong yang tinggal tapi tete-nene moyang pung sumanga juga ada hidop deng katong.

Dace: Su bagitu, katong pung saniri lai seng biking dong pung bageang par ator negri ni bae-bae. Beta cuma taku jang sampe satu waktu orang su tar dapa lia katong pung negri lai tagal jalang-jalang tatutu, lalu kalo su bagitu katong pikirang tatutu lai. Su seng pikir hidop basudara, laeng su seng mangente laeng pung susa, satu-satu pikir dia pung snang sandiri, mabo deng sinetron-sinetron bodo tu yang cuma biking aer mulu tumpa deng ruma-ruma samemer deng oto-oto lex. Katong mabo deng mimpi-mimpi yo hidop sandiri yang nyata-nyata di muka biji mata tar biking batul-batul.

Etus: Yang beta herang lai, anana di rumah su tar mau sonto ikang lai. Dong bilang su pastiu. Tuang ampong jua... beta baru dengar ni kata ada orang pastiu makang ikang. Dong bilang mo makang ayang mekdonal. Bapa tela... apa tu lai?

Dace: Ose ni memang paleng takisu. He, biar hidop di kampong tapi pikirang tu musti tabuka sampe di jiku-jiku dunia. Ayang mekdonal tu ayang dari amerika. Dia pung isi lombo, la katong cuma cake deng nasi panas antero ato kantang goreng deng minong koka-kola. Akang nama “pas put” (fast food) barang se cuma tunggu 1 menit akang su ada.

Etus: Ale su rasa akang?

Dace: (sambil garu kapala) Hehehe... balong kawan.

Etus: Bapa kamponang... se carita macang su rasa akang. Kalo cuma bagitu dia pung sadap apa? Lebe bae ikang asar, kua colo-colo, nasi panas lalu abis itu tola deng sageru. Abis makang mata mamboro, tinggal cari tampa sombar par tutu mata deng rasa anging sibu-sibu. Sadap eee...

Dace: Ose ni tar laeng pikirang cuma par sono deng isi poro. Ada haros jua poro kamboti.

Etus: Hahahaeee...huurraaa... Dace, hidop ni jang pikir susa talalu. Hidop seng dua kali nyong. Tuangala su kasi hidop ni nikmati akang. Karja bole karja tapi inga biking sanang diri. Ale su lia banya orang stres kumpul kepeng sampe taputar-putar macang ampiong la abis itu kepeng kaluar cuma par bayar ongkos saki. Untung bae kalo masi bisa turong dar koi, kalo seng lai punggul di kerko. Itu yang orang tatua bilang “biar miskin tapi tau snang sa”. Mo pikir susa? Sampe jua. Kalo saki seng ada yang pikir katong nyong.

Dace: Batul tamang ee... katong sanang bisa rasa kemajuan, jalang oto su bagus, su ada skolah, su ada puskesmas, su ada telepisi kabel, amper samua su ada. Tapi yang katong musti jaga jang sampe cara hidop orang basudara yang su ada dar dolo akang takikis tagal katong mo bastel macang orang jakarta. Busu-busu katong pung kampong jua. Di sini katong masi bisa dengar burung bacico, mandi aer masing iko suka, jaga duriang, pi mangael. Jadi musti jaga negri ni bae-bae, bukang par katong tapi par anana cucu.

Etus: Dace, su glap ni. Mari singga dolo di ruma. Maitua ada biking kolak pisang. Ini bukang pisang mekdonal tapi pisang meknaku...hahahaeee...asli dari tana Naku.

Dace: Sudara ee...ale pung bagini-bagini ni yang beta paleng sayang se. Be su lama seng rasa akang tu. Katong bakira jua jang sampe akang dinging.

Etus: Kalo par bagitu se paleng capat.

***Ini cuma carita kewel dari nyong Naku. Jang mara kalo ada yang pung nama sama. Tunggu kewel berikutnya. Hahahaeee...