Kewel 3 - Natsar Asidah

Satu kali ada Dace deng Etus afsprak baku dapa di Dace pung ruma tagal Uceng, dorang 2 pung tamang skolah dolo, ada datang bawa nanas 4 ika dari Larike.

Etus: Tabea amalatu Dace...beta bisa maso ka ama pung baileu ka?

Dace: Eh, bapa tela, tamang ee...mae nusu ka baileu ni. Ale umur panjang, beta deng Uceng ada bar bilang ale pung nama ni.

Etus: Tabea abang Uceng...su lama paskali katong seng baku lia ni. Ada bae?

Uceng: Salamat baku dapa lai abang Etus. Alhamdulilah, beta, maitua deng anana ada bae samua. Jang kurang hati caca Ija tar bisa iko kamari tagal ada manyimpang deng ator mamasa par Acim kacil pung acara sunat ahad muka ni.

Etus: Istaganaga. Acim yang dolo masi mera-mera abang dukung manyabrang deng spit dar balakang pasar tu, dia su mo basunat jua? Oras ni akang bajalang capat lawang e. Tutu mata buka mata, tarek-lunjur, takojo katong su rambu puti, anana su garser nae-nae badang.

Dace: He, he, Etus...co ale tahang carita tu dolo. Dudu kamari dolo di beta pung tapalang ni. Ale bar maso pintu ruma su mangkera par batanya. Na, bagitu ka. Jadi ale su ada ni, beta kira jang buang tempo lai, abang Uceng bilang maksud suda.

Uceng: Iyo, dangke lai. Abang Dace deng abang Etus, beta pung kedatangan ni ada bawa maksud mo buang suara par abang dong. Kalo wer ada bae, abang dong deng maitua bisa buang langka ka beta ruma di Larike jua. Beta deng Ija ada mo kas sunat Acim kacil ni. Katong seng biking apa-apa abang, cuma mangkali makang sadiki par basudara di Larike deng tamang-tamang skolah dolo.

Etus: Ayoooeee...abang Uceng e, caca Ija ada biking asidah ka seng?

Dace: Oooeee...Etus kamboti ee...ose tar bisa mahanang aer mulu lai ka? Dengar Uceng abis bicara dolo.

Etus: Hihihi...jang mara gandong. Beta pung snup dolo-dolo tu jadi beta sampe lupa diri ni...lanjuuuttt Uceng.

Uceng: Bagitu suda abang ee...Ija memang su kas inga beta jang lupa pi ka Naku bawa nanas 4 ika ni deng kas suara abang Dace deng abang Etus. La turong dar sini dia suru beta singga di pasar par bali tarigu, gula mera makassar, gula pasir. Haji Lan pung pondok di negri cuma jual gula mera surabaya, kalo pake itu asidah rasa sadiki pait. Paleng pas cuma deng gula mera makassar. La ini cuma tagal inga abang Etus pung kukis sayang tu.

Dace: Uceng ee...beta deng kluarga mo bilang dangke lai. Ale su datang manginte katong di Naku ni par kas suara katong deng ale pung hajatan tu. Kalo par beta, mo wer bae ka tar bae, beta deng maitua pasti sampe di Larike par Acim pung sunat. Maar ale kas tau beta dolo, ale pung ruma masi yang dolo to? Yang di muka ada pohong apukat to?

Uceng: Itu akang suda abang. Kalo abang Etus bagumana?

Etus: Uceng ee...ale su tau beta pung hidop te...beta ni mo di Larike ka mo di Hila, mana ada orang game par maso cake beta sorong tamang eee... Mantap abang, beta deng maitua seng undur salangkah lai. Mena....yang penting asidah di muka.

Dace+Uceng: Aahahahahaeeee....kamboti eee...

Uceng: Abang Etus, Ija bilang asidah cuma par abang saja. Asidah seng abis, abang seng bole pulang. Beta su bilang anana Larike par jaga abang Etus cangkol asidah.

Etus: Aooo...Uceng jang ale bagitu. Masa beta musti cake asidah sasandiri bagumana lai? Biar kata kamboti lai, maar jang bagitu ah...

Uceng: Seng abang. Ini katong su natsar asidah par abang saja ni.

Etus: Atangala...ampong jua.

Dace: Ahahahahaeee....mampos ose. Barangkat deng se pung kamboti tu.

Basudara, ini cuma carita hidop orang basudara di Maluku. Mo Salam mo Sarane mo Hindu katong samua anak Maluku. Jang mara kalo ada tasimpir nama...ini cuma hahangkae dar nyong_naku. Amatooo...