Aku menulis maka aku belajar

Tuesday, March 18, 2008

Kewel 2 - Kintal Internet

Basudara tuang jantong hati ee... salamat baku dapa kumbali. Masi inga Etus "kamboti" deng Dace "meti" to? Nah, satu pagi Etus "kamboti" baku dapa deng Dace "meti" di mata jalang ka Negri Ema.

Dace: Slamat pagi nyong Etus. Ada bae ka? Mangapa lai kong par poka-poka ni ale pung muka su takoro macang papaya masa tar jadi? Seng dapa sono ka apa?

Etus: Sudara ee... slamat pagi lai. Ale ni tai mata ada balong karing kapa kong par matahari su pica ni ale bilang beta muka takoro. Ini bukang takoro tapi asli manganto tumbak tagal satu malang dudu ajar barekeng Cemo kacil di ruma.

Dace: Ooo...bagitu. Lalu ini tuang mo pi mana kong su deng kameja neces rambu manyala pamade kacamata molo itang mati nat? Ale su ada asprak iko baris empang di bendar kapa ee?

Etus: Oeee Dace, jang se biking beta mandidi par pagi hari ni. Beta seng asprak par iko baris empang di bendar, tapi ada dapa kertas dari tuang guru Simon tagal su dua hari ni Cemo seng maso klas. Beta su montar dia tadi malang deng cawani rotang jawa sampe minta-minta ampong. Bagumana beta seng jumawa, orang tatua ada basuet tenga hari padis di kabong saban hari asal par lia anana bisa skolah, maar akang ana ni tar unju muka di skolah. Biar seng usa sampe sonto bintang di langit asal bisa par angka orang tatua pung muka sadiki jua. La ini skolah bukang par katong maar par dorang pung hidop nanti te...

Dace: Tamang, hati bole panas tapi ingatang taru tangang par anana musti rasa-rasa lai. Jang sampe ale dapa loko dari om Buce polisi tagal biking kekerasan dalam rumahtangga. Jang ale kira anana tu macang tana mera par biking batu tela, yang cuma nanti par katong ero iko katong pung suka. Su oras bagini katong pung anana pikirang su tabuka. Dong sakarang bukang cuma tau dunya sacubi macang katong orang tatua. Dong sakarang ni su tau dunya pung salekar-salekar apalai deng internet.

Etus: Itu akang suda...Samalang abis ajar barekeng beta dudu baku soal deng Cemo mangapa kong dia seng pi skolah. Dia mangaku "ama, beta pi baku tahela deng tamang-tamang par barmaeng plei stesien (play station) lalu lanjut deng ceting (chatting) di internet". Tungala ampong beta jua...beta memang orang kampong tar mangarti akang barang-barang yang dia bilang tu.

Dace: Etus...Etus..., tagal itu nyong dolo-dolo kalo orang tatua bilang sakolah tu biking akang bae-bae. Sakarang bar ose rasa anana pung barmaeng kuti kata sa ale su tabingong-bingong. Ose tau jareng to? Nah, internet tu macang jareng basaaaarrrr eee... Lalu katong sakarang ni hidop baku tagae, baku tarika, dalang jareng basar ini. Kalo nonton brita di telepisi ale dapa tau perkara apa yang su jadi di Balanda, Amerika, Jepang, pokoknya saantero dunya ni ale bisa tau akang. Jadi katong ni sebenarnya laeng su tau laeng pung kartu. Dalang jareng basar internet katong bisa mangente kasta laeng yang hidop di sebrang lautan. Bukang cuma itu, lewat internet katong bisa bastori kewel deng kasta laeng di tampa laeng ato negri laeng. Anana sakarang ni pung kintal barmaeng su tar bisa nanaku dia pung sipat lai. Ini yang katong bilang "su langgar sipat".

Etus: Istaganaga. Dace, ale ni memang otak paleng encer lai. Maar ale bilang beta skolah tar batul, yo ale sandiri SMP tar sampe-sampe. Ale memang jago tapi jang ale ola beta macang bagitu. Ale seng inga katong dua pancuri tete Cale pung lacing sampe amper sadiki talucu tasungsang dar pohong lacing ka?

Dace: Hahahahaeee... Etus e katong dua ni bado. Tapi beta masi lebe bae dar ale. Mangkanya biar badang-badang saki tagal pameri di kabong tapi jang lupa baca brita nyong... Supaya jang cuma tau tanang kasbi tapi juga tau harga kasbi di pasar barapa, bisa kirim kasbi ka Balanda ka seng, bisa olah kasbi jadi panekuk ka seng...

Etus: Iya bapa suka. Beta bakira jua ee... Jang sampe tuang guru Simon hogor beta tagal beta langgar janji baku dapa deng ontua. Carita pung carita, ale sandiri mo pi mana ni?

Dace: Gandong ee... Beta bale haluang pi kabong dolo. Beta pung langsa su mulai barangke. Beta musti manggurebe jang sampe anana frei skolah lai dong skot beta pung langsa barsih. Salam voor tuang guru Simon lai jua. Bilang dari Dace ana bijiruku waktu ontua masi pegang klas 5 di blakang soya.

Etus: Eya... Nyong pung salamat lai... Jang lupa taru langsa satu kamboti par om Etus ee...

Dace: Se pung kes panta gayang ni...

Jang kurang hati kalo ada yang pung nama sama. Ini cuma stori kewel sa tentang katong pung hidop...


No comments:

Post a Comment

One Earth, Many Faces

One Earth, Many Faces