Ana Sakolah

Poka-poka Dace pulang bajalang kaki deng muka mara kaning takoro ancor. Talapas jumbatang batu merah amper sadiki lai dia pung tas talapas dar tangang tagal Etus kas takajo dekat pangkalan ojek.

Dace: Cukardeleng ose! Etus ee, kalo tar inga konyadu to beta su pilang ale ni. Jang sangaja bagitu o.

Etus: Hahahae... ini su mangapa lai? Par sore hari ale bajalang deng kaning takoro macang bagitu. Oee, bae-bae jang bajalang deng pikirang, la sala taru kaki skrek lai ale su punggul di kali batu merah. Beta su nanaku ale dar ongkoliong nyadu ee...

Dace: Kaning seng takoro bagemana lai Etus ee... beta ni ada kursus bahasa enggres di poka. Beta ada serius dengar lisening... wangala ee, katong pung instruktur bilang sampe jua barang anana su kaco baku lempar dalang kampus.

Etus: Istaganaga... beta pung nyadu ni tamba tua tamba tajang saja seeh. Ale masi iko kursus bahasa enggres tu lai. Beta kira ale ni su dekat matahari maso su seng taru kira par barang-barang bagitu lai.

Dace: Haa... se pung bagini-bagini ni ada haros katong tinggal tahang deng ton yes-no, la abis itu cuma bisa nganga orang bicara sampe aer mulu tumpa. Ale seng tau kata katong ni su musti siap par akang Sail Banda tu. Ale tau, ini nanti ada ribu-ribu orang bule mo maso Ambong.

Etus: Oo.. kalo sail banda beta tau. Tapi sabar dolo, jadi ale bajalang kaki ni...

Dace: La kira-kira beta mau molo dari martafons sampe galala? Bajalang jua. Tar ada oto satu lai. Dong su taku bajalang barang anana potar tu dong su baku lempar. Asal kata mahasiswa mar pikirang deng kalakuang macang orang seng skolah. Lebe bae macang beta bagini.

Etus: Itu akang nyadu ee... beta tar abis pikir lai mangapa tagal baku tatoki sadiki katong seng dudu bicara deng pikir akang bae-bae la cari jalang supaya samua pung mau laeng mangarti laeng.

Dace: La kalo su bagini, katong mo harap apa lai? Dong-dong itu akang orang-orang sakolah kio. Su balajar tikang kapala, mata tarobe sasamalang par dudu baca buku-buku tehupiori.

Etus: Oee... teori bukang tehupiori.

Dace: Itu sudah.

Etus: Nyadu eee.... tagal itu beta mo bilang ale bukang, lebe katong yang seng sakolah skali tapi mangarti hidop orang basudara gandong. Katong ni memang bukang orang sakolah tinggi mar katong tau ilmu hidop. Jadi beta rasa dong-dong itu musti balajar ilmu hidop lai. Jang cuma baku taroso deng ilmu-ilmu yang dong kasta kakarlak tanang dalang dong pikirang.

Dace: Iyo, iyo, sudah... jang ale bicara banya lai. Mari saribu dolo par se pung nyadu ni nae ojek. Beta su rasa engkel-engkel kaki pata-pata.

Etus: Ale ni seng laeng jua... saban bakudapa musti pata katong.

Dace: Hei, shat yor mot... mari capat kamari.

Etus: Iyo, tahang deng se pung shat yor mot... tar lama beta mot se.

[ini cuma kewel Dace deng Etus... jang mara kio kalo ada yang takanal di hati. Mara jua seng apa-apa, asal jang lupa tatawa... hahahaeeee....]