Ikan Sabala di Marche Poncelet

Oleh: Siake Manue

[Coretan ini adalah kiriman dari beta pung tamang, Siake Manue, yang dar dia beta dapa izin voor posting di blog ini. Danke lai...]

Su beberapa kali beta pasiar ke Paris, maar baru kali ini beta pung hati rasa garu-garu par baronda sadiki di pasar. Sebab musabab beta hotu ke pasar pagi ini, tagal ana lida su bagatal par makang ikang faresko. Tau jua beta putus pusa di pinggir pante negri Pelasona Nanuroko, dan kemudian garser di ombak pukul-pukul Kota Ambon Manise. Jadi seng skrek kalo bobou anyer ikang su tacampor deng beta pung darah.

Marche Poncelet, pasar kacil di dalang gang, akang seng jauh dari beta pung sudara parampuang pung rumah. Mangkali satetok saja dari Boulevard De Courcelles, salah satu ruas jalan samemer di jantong kota Paris. Tiba di ujung gang, su dapa lia orang papalele buah rupa-rupa macam. Lia bagitu beta dapa inga tanta-tanta gunong papalele buah di Batu Meja. Maski bagitu beta pung ekor mata cuma tarkira par care tampa bajualang ikang saja. Mangkali 25 meter di muka, biji mata tatumbu meja jual ikang di sablah kiri jalan. Hayoo’eee rasa-rasa mau balumpa saja, slak beta lia rupa-rupa macam ikang, udang, katang deng bia yang su seng asing par beta lai. Memang akang seng banya macang di Pasar Arumbae blakang kota Ambon, maar par beta yang su lama tra hotu ke Pasar Arumbae, dapa lia ikang deng bia di Marche Poncelet, parsis macang ada dudu talantang, tunggu orang bameti bia di pante karang Negri Kulur.

Slak sorong lebe dekat par cartau harga ikang, deng segra beta pung adrenalin tasumbur macang bubara babanting tacigi tagae matakael di Saaru Umel, Negri Leawaka. Bagemana seng skrek kalo ikang Sole yang panta poro merah muda (katong di negri bilang ikang sabalah) pung harga 45 euro/kg. Rekeng deng rupiah berarti Rp. 585.000/ kg. Kalo tarkira akang pung garos maka 1 kg mangkali cuma 3 ekor. Beta banding deng harga ikang sabalah 1 balak/ Rp. 100.000 yang dong papalele akang di jalan Soaema muka SMU II Ambon. 1 balak tuh kalo beta lepas es maka bisa dapat barang 15 kilo ikang sabalah. Selain ikang sabalah maka beta liat juga dong ada papalele ikang Turbot deng harga 40 euro/kg. Ikang muka tarbae yang akang pung nama di negri ”ikang Pampang”, ternyata kalo hitung deng rupiah maka harganya Rp. 530 000/kg. Disamping Turbot, beta dapa anana ”Raie” (katong bilang ikang pari) yang su kupas kulit deng harga 30 euro (Rp. 390.000)/kg. Kemudian ada juga ”Bigorneaux Cuit” yang dijual deng kulit-kulit (bia itam buntal kacupeng-kacupeng yang biasa dong punggul akang di pante Waitatiri, lalu jual par orang-orang pi peknik di Natsepa) deng harga 22 euro (Rp 286 000)/kg. Ikang ”Rouget Barbet” (Salmaneti merah kacil-kacil) dijual deng harga 35 Euro (Rp 455.000)/kg. Lebe skrek lai, bagmana beta dapa ”Oursin Breton” (duri babi merah) deng harga 50 euro (Rp. 650.000)/kg.

Tongala kas’ampong jua, bagmana lia harga ikang, deng pelan beta hela kaki mundur. Beta pikir kalo mau manekad makang ikang deng harga bagini, maka beta musti segra babungkus pakiang par kas’tinggal Paris. Sambil geser pelan-pelan dari tampa bajual ikang, beta pung ingatang malayang jauh ke negri tercinta Maluku Manise. Negri dimana orang-orangnya bisa sono dalang bakol ikang, atau talantang blakang talpas lelah di atas waya asar ikang. Beta ingat oras pi mangael di muka labuang negri Leawaka dan musti potong putus nyimu, manakala matakael cigi ikan pari. ”Buang akang jua, akang biking salawar par mangael ikang laeng. Katong jua seng makang akang disini”, demikian beta pung tamang Yako Bola bilang bagitu. Beta inga waktu beli ikang sabalah di pasar Arumbae, orang-orang bilang ”pi bali ikang tarlaku bagitu par’apa!”. Beta ingat waktu liat duri babi merah orang tatua bilang musti geser jauh-jauh, jang tatikang kaki la biking sawang seantero badang. Beta inga waktu pi bameti care bia, orang suka anggap mangkali kahidopang su Meti Kei (sangsara paskali) jadi mulai bameti bia. Beta inga waktu mangael dapa salmaneti, orang bilang akang seng sadap par goreng, tagal dagingnya talalu lombo. Beta inga ikang pampang yang tapampang di meja-meja jualan pasar ikang Arumbae, maar yang katong lia akang deng mata sabla. Konci rekeng beta pung kasimpulan kalo katong anana negri seumpama tukang jual mas yang tartau taksir harga mas. Katong behkan seng tau mana mas tuangan dan mana mas sopuhan.

Deng hotu ke Marche Poncelet beta semakin mangarti mangapa katong pung lautan jadi tampa mancari ikang (fishing ground) yang paling rame di Indonesia. Jepang, Korea, Thailand, China, Philipina dan berbagai suku bangsa lainnya, datang barampas di lautan Aru, Banda, Arafura, Seram, sampe di salekar-salekar pulau-pulau kecil di seluruh Maluku. Beberapa nahkoda kapal ikan asing yang dapa loko di perairan Maluku, dalam kesaksiannya di media masa bilang ”kualitas & keragaman ikan yang paling baik di seluruh dunia berada di laut Maluku”. Beta seng tau berapa banyak kepeng yang katong dapa par negri ini dari emas anyer hasil lautan yang begitu kaya. Deng luas lautan sebesar 92,4% (658.294 km2) dari total teritori negri raja-raja ini, tantu beta seng skrek ada sekian banyak kekayaan yg talamburang, mulai dari ombak pica-pica sampe aer masing biru balau. Pada teritori laut yang begitu luas katong pung potensi penangkapan ikan iko data Bapeda Maluku sebesar 1.640.030 ton/taong (ini balong termasuk ikan-ikan yang masih barmaeng enggo basambunyi), sementara yg dimanfaatkan baru sebesar 40,09% (sapa yang manfaatkan akang’ee?).

Tuangampong jua, beta bayangkan deng luas laut sabuku mai, barapa banyak ikang sabalah sampe sapulu balah yang basena kasana-kamari’ee. Barapa banya anana pari yang masih tai ingos malele sampe yang su babisa basar buah tangang, barmaeng leng kalileng di aer masing biru. Barapa banya bia rupa-rupa corak, barmaeng ciluk-ba di tanusang-tanusang waktu meti. Barapa banya duri babi yang masih babulu alus-alus, sampe su baduri garos-garos macang batang salak negri Wakal, talantang tunggu slak par tikang kaki.

Kalo saja ada yang bisa kalkulasi katong pung isi lautan pung nilai ekonomi di pasar international, beta kira katong pung kepeng PAD bisa angka deng bakol jiop kio. Cuma kasiang lawang’ee kalau beta tarkira data kemiskinan, ternyata banyak dari katong pung basudara, tinggal hidop kasiang-kasiang, sepanjang 11.000 km garis pantai yang talantang di Maluku. Tapi memang beta seng skrek juga, tagal PDRB (Produk Domestik Regional Bruto) Maluku taong 2005 iko data BPS Nasional cuma 3.652.034 (No 2 paling bawa dari 25 Prov yg terdata). Sioh sayang la dilale, sapa makang isi, sapa dapa tulang?. Sapa cake ikang, sapa ciong anyer?. Tinggal di aer masing, maar cuma tarima muntah slak ombak balumpa, sambil tumbu dada banggakan kantor perwakilan Maluku di Jakarta, yang lebe bagus dari samua provinsi laeng.

Pulang dari Marche Poncelet beta rasa seng ambel bae bagitu. Beta jadi gagartang, bukan tagal tar jadi cake ikang maar tagal rasa hati tatikang. Tatikang bisa pari, tatikang duri babi, tatikang sungut salmaneti, tatikang bia ba’ostar, dan laste-laste tatikang hogor basar, Usaha Mina (perusahan ikan milik Daerah Maluku) yang gulung tikar deng utang satambong. Sementara Upu Latu deng para masnaitnya tinggal bajalang mangael investasi sondor hasil, atas nama study banding, sambil para nyoranya borong parfum, di Sephora Champ Elysee atau beli capeu di Gallery Lafayette, hahahaeeee huraaaa.